بصراحه يارب انا عندى عتاب
ليه الناس
عماله تكدب فى الطيب
وتصدق بس لسان كداب
طب ليه فى فقرا
بتاكل عيش من خبط الباب
و"مد الايد" ..
وبتلبس دايما اقدم لبس
وناس تانيه بترمى الطقم
" لسه جديد "
طب ليه فى ناس بتموت م الجوع
طب فيه كام واحد موجوع
وكام واحد عايش مرتاح
طب ليه فى حروب
وناس بتقتل ناس بسلاح
من صنع ايدينا وتفكيرنا
طب ساكت ليه ؟
مش بتصحى
فينا ضميرنا
موتنى وموت كل الناس
واخلق فى الدنيا ناس غيرنا
على نفس الشكل
لكن مفيهمش غيرة وحقد
وظلم وقتل
واعمل دنيا غير الدنيا
يكون الخير حاضر فعلا
والشر غياب
بصراحه يارب انا عندى عتاب
انا واثق جدا فى طريقتك
وف احكامك .. وف ترتيبك
بس انا بتكلم من ثقتى
ان انا غالى عندك جدا
وانى حبيبك ♥
انا بس مش قادر افهم
يمكن علشان عقلى المحدود
كل ما يسألنى بقف ساكت
مش لاقى ردود
افهم بيها ايه جوايا ...
غير ان البحر عشان واسع
صعب انى ااحطه فى كوبايه
