هي يعني الفرحه لازم تيجي شابكه ف....

هى يعنى الفرحة لازم تيجى شابكة ف الدموع ....
ولا كل طريق بيبدأ تهزمه سكة رجـوع ....
كل ذكرى بتفتكرها تبقى عن جرح و فراق ....
ليه تعيش العمر عتمة وانت حواليك الشموع ...

فيها إيه لو قلب خانك .. حِب وابدأ من جديد ....
سيب حروف قلبك تغنى وابتسم لو مش سعيد ...
وان وقعت ف لحظة عافر ..واتسند على إيد صديق ...
مهما كان الجرح قاسى .. بكره جاى ولو بعيد ....

انسى ضعفك وانسى ألمك .. انسى أحزان السنين ...
والغناوى ان مرة تاهت تعلا وتزيح الأنين ...
مهما طال الليل مسيرُه يتمحى ببسمة نهار ...
عيش حياتك قلب صافى.. ليه تعيش خايف حزين ...

فيه قلوب بتخون ولكن .. فيه قلوب بتخاف عليك ....
ليه بترضى تعيش ف كدبة و الحقيقة قصاد عينيك ...
كلمة صادقة تقولها مرة .. تنفتح بيها البيبان ....
كون حقيقتك .. عيش بقلبك .. تملك الدنيا بإيديك

تحميل

click to begin

1.2MB .zip