لبرد بيسرِى جوه الروح
و تتدارَى من المكتوب
ف حيرة معاك منين ما تروح
و تتكعبل ف أحزانك
تُقــع و تقــوم
و تستعجل سنين العمر و تعدي
و تتحايل
و تترجَّـى
يا ستى استنى
طَب هدِّى
خلاص الفرحة أهى جاية
هتتأخر لكن جاية
تقولك راح عليها الدور
معادش مكــان
ما بين كام ذكرى مجروحة
و كام صورة بلون بهتان
و كام غنوة
يرن نغمها ف ودانك
و تايه من كلامها كلام
معادش مكان
و تتكعبل ف أحلامك
تُقــع و تقــوم
بقيت بتخاف من المقسوم
بقيت بتخاف من المسافات
و م الأوقات
و من شنطة سفر قاسية
بقيت بتخاف عيون الناس تكون ناسية
تخاف ينسوك ..
يقولوا .. أيوه كان طيب
و كان مجدَع
و كانت ضحكته عاليه
لكن غايب
بعيد غايب بقالُه زمــــــان
